Елордада студенттер фестивалінің жеңімпаздары марапатталды

Астанада халықаралық студенттер күні қарсаңында «JASTAR JALYNY-2024» студенттік шығармашылық-спорттық фестивалінің жеңімпаздары марапатталды, деп хабарлады Elordainfo.kz елорда әкімдігінің баспасөз қызметіне сілтеме жасап.

Фестивальдің мақсаты – жастардың шығармашылық әлеуетін ашу және дарынды студенттер мен ұжымдардың дамуына жағдай жасау.

«Студенттік өмір –  мәңгі есте қалатын уақыт, оны ұмыту мүмкін емес. Жастар – қоғамның қозғаушы күші, одан әрі дамудың негізі және әр елдің болашағы. Бүгінгі таңда елордада 450 мың жас тұрады. Құрметті жастар, Сіздерді мерекелеріңізбен құттықтаймын!», - деді Астана қаласы әкімінің орынбасары Есет Байкен.

Конкурстық бағдарламаға елорданың 15 ЖОО-нан 100 мыңға жуық студент қатысты.

Фестиваль қатысушыларының өнерін мәдениет, өнер және спорт қайраткерлері бағалады.

Студенттер футбол, волейбол, шахмат, үстел теннисі, эстрада, домбыра, ұлттық және заманауи би, театр және мобилография сияқты өнер және спорт түрлері бойынша бақ сынасты.

Гран-при барлық номинацияның қорытындысы бойынша ең көп балл жинаған Қазақ ұлттық өнер университетіне берілді. Фестивальдің бас жүлдесі – 500 000 теңге. Екінші командалық орынға дене шынықтыру және бұқаралық спорт академиясы, үшінші орынға С.Сейфуллин атындағы Қазақ агротехникалық зерттеу университеті ие болды.

Әр номинацияның жеңімпаздары ақшалай сыйлықтармен марапатталды. Бірінші орын үшін 100 000 теңгеден, екінші орынға 70 000 теңгеден, үшінші орынға 50 000 теңгеден табыс етілді.

Номинациялар бойынша жеңімпаздар:

Шахмат: I орын – дене шынықтыру және бұқаралық спорт академиясы, II орын – Astana IT University, III орын – Назарбаев Университеті.

Ұлттық би: I орын – Қазақ ұлттық хореография академиясы, II орын – Esil University, III орын – Astana International University.

Мобилография: I орын – С. Сейфуллин атындағы Қазақ агротехникалық университеті, II орын – Қазақ ұлттық өнер университеті, III орын – Қазақ ұлттық хореография академиясы.

Ұлттық аспап (домбыра): I орын – Қазақ ұлттық өнер университеті, II орын – С. Сейфуллин атындағы Қазақ агротехникалық университеті, III орын – Л.Н. Гумилев атындағы Еуразия ұлттық университеті.

Эстрада: I орын – «Тұран-Астана» университеті, II орын – Қазақ ұлттық өнер университеті, III орын – Esil University.

Театр: I орын – Қазақ ұлттық өнер университеті, II орын – Л. Н. Гумилев атындағы Еуразия ұлттық университеті, III орын – С. Сейфуллин атындағы Қазақ агротехникалық университеті.

Футбол: I орын – дене шынықтыру және бұқаралық спорт академиясы, II орын – Назарбаев Университеті, III орын – С. Сейфуллин атындағы Қазақ агротехникалық университеті.

Үстел теннисі: I орын – Л. Н. Гумилев атындағы Еуразия ұлттық университеті, II орын – дене шынықтыру және бұқаралық спорт академиясы, III орын – Назарбаев Университеті.

Волейбол: I орын – дене шынықтыру және бұқаралық спорт академиясы, II орын – Назарбаев Университеті, III орын – Мақасұт Нәрікбаев университеті.

Заманауи би: I орын – А.Қ. Құсайынов атындағы Еуразия гуманитарлық институты, II орын – Қазақ ұлттық өнер университеті, III орын – Astana IT University.

Сонымен қоса, мұнда көпке танымал өнер жұлдыздары AYREE және QARAKESEK  өнер көрсетті.