Қазақстанда биыл 54 сауда үйі пайдалануға берілді

Биылғы жылдың қаңтар-қыркүйек аралығында Қазақстанда жалпы ауданы 110,7 мың шаршы метр болатын 54 сауда үйі пайдалануға берілді. Іске қосылған нысандардың нақты құны 48,1 млрд теңгені құрады. Бұл туралы Elordainfo.kz Ұлттық статистика бюросына сілтеме жасап хабарлады.

Сауда үйлерінің көбі Түркістан облысында іске қосылды – 18 нысан, Атырау облысында – 6 нысан пайдалануға берілді. Ал Маңғыстау облысында 1 сауда үйі пайдалануға берілді.

Сонымен қатар, 9 айда жалпы ауданы 26,9 мың шаршы метр болатын 46 супермаркет іске қосылды, олардың жалпы құны 12,5 млрд теңгені құрады. Супермаркеттердің көпшілігі Қызылорда (16) және Түркістан облыстарында (15) ашылды.

Сондай-ақ аталған кезеңде жалпы ауданы 27,1 мың шаршы метр болатын 158 минимаркет іске қосылды. Минимаркеттерді іске қосудың жалпы құны 11 млрд теңгені құрады.

Минимаркеттің көпшілігі Түркістан (31), Жамбыл (22) және Ақмола (21) облыстарында ашылды.