Каспий жағалауында аққулар қырылып жатыр

Каспий жағалауында аққулардың өлексесі табылуына байланысты Маңғыстау облысының экология департаментінің мамандары судан сынама алды, деп хабарлады Elordainfo.kz Lada.kz сайтына сілтеме жасап.

«Маңғыстау облысының экология департаменті 4А ықшам ауданындағы теңіз жағалауынан бірнеше өлі құстың өлексесі табылғанын хабарлады.

Осыған байланысты 3 сәуірде экология департаментінің мамандары теңіз суынан сынама алу жұмыстарын жүргізді.

Нәтижелер қосымша жарияланад», – деп хабарлады департамент.

Әлеуметтік желіде ақтаулықтар қала жағалауында өлген немесе әлсіреген аққулар туралы жиі хабарлап отырады.

Бұған дейін 4А ықшам ауданындағы жағалауда демалушылар құстардың өлу оқиғасын тіркеген болатын. Осыдан кейін Маңғыстау облысы бойынша экология департаменті 20 наурыздағы теңіз суын зерттеу хаттамасына сәйкес ластаушы заттар табылмағанын хабарлады.