Қазақстандықтар барлық медициналық қызметтердің 9 пайызын қашықтан алды – ДСМ

Фото: Оңалхан Өнерхан

Шалғайдағы және ауылдық елді мекендердің тұрғындары үшін мамандандырылған медициналық көмекке қолжетімділік дәстүрлі түрде қашықтықпен және бейінді мамандардың жетіспеушілігімен шектелді. Телемедицина бұл жағдайды біртіндеп өзгертіп, ірі қалаларға бармай-ақ консультация алуға және сүйемелдеуге мүмкіндік береді, деп хабарлады Elordainfo.kz.

«Осы жылдың 11 айында медициналық ұйымдар 3,5 млн қашықтықтан медициналық қызмет көрсетті – бұл көрсетілген көмектің жалпы көлемінің 9,03%.

Мұндай консультациялардың негізгі бөлігі ауыл тұрғындарына қатысты болды. Бұл тек алғашқы консультациялар туралы ғана емес, сонымен қатар қашықтан бақылау, диагноздарды нақтылау және пациенттерді сүйемелдеу туралы», - делінген Денсаулық сақтау министрлігінің хабарламасында.

Еліміздің сегіз өңірінде 100-ден астам медициналық ұйым тартылған «Онлайн-медицина» пилоттық жобасы іске асырылуда. Жоба медициналық көмектің қолжетімділігін арттыруға және аумақтық теңсіздікті төмендетуге бағытталған.

Бұған дейін Премьер-министр Олжас Бектенов Мемлекет басшысының медициналық қызметтердің сапасын арттыру бойынша қойған міндеттері шеңберінде денсаулық сақтау саласын цифрландыру мәселесі бойынша кеңес өткізген болатын.