Іздеу «Президент көлік саласына кеңінен тоқталды»: Геннадий Шиповских сұхбатқа қатысты пікір білдірді
Гүлден Мәдениет
Парламент Сенатының депутаты Геннадий Шиповских Президенттің Turkistan газетіне берген сұхбатына қатысты пікір білдірді. Сөзінше, Мемлекет басшысының сұхбатында көтерілген маңызды мәселелердің бірі – көлік және логистика саласын дамыту, деп хабарлайды Elordainfo.kz.
«Мемлекет басшысы Turkistan газетіне берген сұхбатында ел дамуына тікелей әсер ететін бірқатар маңызды мәселелерге тоқталды. Соның ішінде көлік және логистика саласы кеңінен қамтылды.
Президент атап өткендей, Қазақстан теңізге тікелей шығатын жолы болмаса да, Еуразияның дәл ортасында орналасқан. Бұл – біз үшін үлкен мүмкіндік. Осы артықшылықты тиімді пайдаланып, елімізді Еуразия кеңістігіндегі ірі көлік хабына айналдыру – стратегиялық мақсат», - деді депутат.
Депутат сұхбатта соңғы жылдары атқарылып жатқан нақты жұмыстар айтылғанын тілге тиек етті.
«Жақында іске қосылған «Достық – Мойынты» теміржол магистралі Қытай мен Еуропа арасындағы жүк тасымалын бірнеше есе арттыруға мүмкіндік береді. Ал алдағы уақытта жаңа теміржол желілері іске қосылып, 2030 жылға дейін мыңдаған шақырым теміржол салынып, жөнделмек.
Сонымен қатар «Орталық – Батыс» күре жолының құрылысы ел ішіндегі қатынасты жеңілдетіп, өңірлер арасындағы байланысты нығайтады. Бұл тек логистикаға ғана емес, жалпы көлік саласының дамуына серпін беретін маңызды жоба», - деді ол.
Депутат Президенттің көлік пен логистиканың бүгінгі таңда геосаясаттың да ажырамас бөлігіне айналғанын назарға алып отырғанын айтты.
«Қазақстан халықаралық көлік дәліздерін дамытуға белсенді қатысып, «Бір белдеу – бір жол», «Солтүстік – Оңтүстік» және Транскаспий, яғни Орта дәліз бағыттарын ілгерілетіп келеді.
Жалпы, бұл сала – тек жол мен теміржол ғана емес, бүкіл экономиканы біріктіретін маңызды жүйе. Сондықтан порттарды, әуежайларды, вокзалдарды жаңғырту, сервисті жақсарту және цифрлық шешімдерді енгізу – мемлекеттің басты міндеттерінің бірі», - деді Геннадий Шиповских.
Айта кетейік, бүгін Turkistan газетінде Мемлекет басшысы Қасым-Жомарт Тоқаевтың кең көлемді сұхбаты жарияланды.
