Елдегі мектеп асханаларының 95%-ы санитариялық бақылаудан өтті

Фото: ҚР Денсаулық сақтау министрлігі

Жаңа оқу жылына дайындық шеңберінде Денсаулық сақтау министрлігі санитариялық-эпидемиологиялық қауіпсіздік талаптарының сақталуына қатысты мектеп білім беру нысандарының 99%-ын мониторинг жүргізді, деп хабарлайды Elordainfo.kz Денсаулық сақтау министрлігіне сілтеме жасап.

Оның ішінде асханалардың 95%-ы және медициналық пункттердің 96%-ы қамтылды. Бұл туралы бүгін Үкімет отырысында ведомство басшысы Ақмарал Әлназарова мәлімдеді.

Санитариялық-эпидемиологиялық бақылау мониторингінің қорытындысы бойынша анықталған бұзушылықтарды жою туралы 8,4 мың нұсқама беріліп, жедел ден қоюдың 287 шарасы қабылданды. 13 тамыздағы жағдай бойынша нұсқамалардың 82,8%-ы, яғни 6 961 нысан бойынша талаптар орындалды.

«Жаңа оқу жылы басталғанға дейін анықталған бұзушылықтарды толық жоюды қамтамасыз ету қажет. Мектептердегі тамақтану стандартының талаптары мүлтіксіз орындалуы тиіс», – деп атап өтті Денсаулық сақтау министрі.

2026 жылғы 1 ақпаннан бастап мемлекеттік бюджеттен қаржыландырылатын балаларға арналған нысандар үшін мемлекеттік бақылаудың ерекше тәртібі қолданылады.

Еске салайық, бұған дейін білім беру нысандарында тамақтан улану жағдайлары төрт есеге азайғаны туралы жаздық.