Шетелге шығуға тыйым салынғандығын қайдан білуге болады

Шетелге шығуға тыйым салудың бар-жоғын жедел тексеру үшін eGov.kz порталы мен eGov mobile мобильді қосымшасын пайдалануға болады, деп хабарлады Elordainfo.kz.

Шетелге сапар жоспарлаған кез келген адам өз жоспарына ешқандай кедергі болмайтынына сенімді болғысы келеді. Алайда, түрлі қарыздар шетелге шығуға шектеу қоюға себеп болуы мүмкін. Осындай жағдайлардың алдын алу үшін азаматтар елден шығуға тыйым салудың бар-жоғын eGov.kz порталы немесе eGov mobile қосымшасы арқылы жедел тексере алады. 

Шетелге шығу құқығын шектеудің негізгі себебі – қарыздардың болуы. Оларға төленбеген салықтар, айыппұлдар, алименттер, коммуналдық қызметтер бойынша қарыздар, сондай-ақ тиісті құжаттық растауы бар жеке немесе заңды тұлғалар алдындағы қарыздар жатады.

Еgov.kz порталында сервисті пайдалану үшін: 

- «Азаматтарға» – «Азаматтық, көші-қон және иммиграция» – «Шетелге шығу» бөлімін таңдау керек;

- «Шет елге шығуы шектелген, борышкерлер тізілімі және атқару өндірісі бойынша борышкерлер тізілімі бойынша шет елге шығуға тыйым салынғандығының бар болуын тексеру» қызметін таңдап, «Онлайн сұрау» батырмасын басу қажет;

- ЖСН/БСН-ды енгізіп, «Ары қарай» батырмасын басу керек;

- мәртебелік бетте сұранысты қарау нәтижесімен танысу қажет.

eGov mobile қосымшасында сервисті пайдалану үшін:

- eGov mobile қосымшасына кіріп және авторизациядан өтіп, «Қызметтер» – «Саяхат, шетелдегі өмір және эмиграция» бөлімін таңдау қажет;    

- «Шет елге шығуы шектелген борышкерлер тізімі және атқару өндірісі бойынша борышкерлер тізілімі бойынша шет елге шығуға тыйым салынғандардың бар болуын тексеру» қызметін таңдау керек;   

- ЖСН/БСН енгізіп, «Тексеру» батырмасын басыңыз;

- тексеру нәтижесімен танысу қажет.

Шетелге шығуға шектеулер қарыз сомасы 40 АЕК-тен асқан жағдайда немесе сот тиісті өндіріп алу туралы қаулы шығарған болса алимент төлемдерінің мерзімі 3 айдан асып кеткен жағдайда қолданылады. Сотпен бекітілген сот орындаушысының қаулысы ҚР ҰҚК Шекара қызметіне жіберіледі, олар шекарадан өту мүмкіндігін бұғаттайды.

Қызмет тегін көрсетіледі және жеке тұлғаларға да, заңды тұлғаларға да қолжетімді. 

Сондай-ақ шетелге шығуға тыйымның бар-жоғын Атқарушылық іс жүргізу органдарының автоматтандырылған ақпараттық жүйесі АІЖО ААЖ арқылы «Шетелге шығуға тыйым салу» бөлімінен тексеруге болады.