Бейжің сапары: Қасым-Жомарт Тоқаев пен Си Цзиньпин кездесуі мемлекеттер арасындағы алтын дәуірге жол ашты

Қазақстан көшбасшысы Қытай аста­на­­сына 3 ақпан күні ұшып келді. Мем­лекет басшысын әуежайдан ҚХР Үкі­ме­ті­нің Еуразия істері жөніндегі арнаулы өкілі Ли Хуэй күтіп алды. Айтпақшы, Қы­тайдың осы жоғары лауазымды дипломаты өткен Жаңа жыл қарсаңында – 30 желтоқсанда Ақордада Қасым-Жомарт Тоқаевтың қабылдауында болған. Сол кезде ол Қысқы Олимпиаданың ашылу рәсіміне Қытай Төрағасының шақыруын табыстады. Президенттің айтуынша, олар бір-бірін шамамен 40 жылдан бері біледі. Екі құрдас өткен ғасырдың 80-ші жылдарының басында Бейжіңде өте жақын араласқан, – деді Президенттің баспасөз хатшысы Берік Уәли.

Оның айтуынша, Қазақстан делегациясы Бейжіңнің батыс бөлігінде орналасқан «Дяоюйтай» мем­лекеттік резиденциясына орналасты. Бұл резиденцияның 800 жылдан астам тарихы бар. Бұрын бұл тарихи әрі көрікті жер Қытай императорларының демалысы үшін арнап салынған сарай болған. Цзинь әулетінің билігі кезінде император Чжанцзун мұнда балық аулайтын плат­форма салдырған. Резиденция атауы қытай тілінен аударғанда «балық аулауға ар­налған террасса» дегенді білдіреді. Содан бері резиденцияға «императорша балық аулау» атауы бекіп қалған.

Осы ретте бір нәрсені айта кеткен жөн. Қасым-Жомарт Тоқаевтан бөлек «Дяоюйтай» резиденциясында ауқымды іс-шара күндері Ресей Президенті Вла­димир Путин мен Пәкістан Премьер-Ми­нистрі Имран Хан ғана тоқтады, ал өзге делегациялар қонақүйлерге орналастырылды. Әрине, бұл Қытай тарапының Қа­зақстан басшысына, жалпы біздің елге деген ерекше құрметін, айрықша көз­қарасын білдіреді, – деді Б. Уәли.

Сондай-ақ ол әлемде кең тараған коронавирус індетіне байланысты Қытай астанасында да шектеу шаралары күшейгенін айтты.

Бүкіл әлемде өршіп тұрған корона­вирус­тың жаңа «Омикрон» штамы жағ­дайында Қытай билігі бұрын-соңды бол­маған шектеу шараларын енгізді. Бұл хат­тамалық шараларға да өзінің әсерін ти­гізді. Мысалы, белгіленген тәртіпке сәй­кес Президенттің шетелдік сапарларын дайындау кезінде Мемлекеттік күзет қызметінің, Президенттің баспасөз қызметі мен Протоколының, сондай-ақ Президенттің Іс басқармасының бірнеше қызметкерінен тұратын алдын ала баратын топ құрылады. Сол алдын ала баратын топ Мемлекет басшысының Бейжіңге баруына біржарым күн қалғанда жетті. Осындай қысқа мерзімге қарамастан, аталған жұмыс тобы ҚХР СІМ жауапты қыз­меткерлерімен, күзет қызметімен бір­лесе отырып, сапардың барлық хаттамалық мәселесін толығымен шеше алды. Біздің делегацияға қытайлық ұйымдастырушылар тарапынан ерекше қонақжайлылық көрсетілді, – деді Президенттің баспасөз хатшысы.

Сапар барысында екіжақты келіссөз жүргізіліп, Қасым-Жомарт Тоқаев Си Цзинь­пинді қыркүйек айында елімізге мемлекеттік сапармен ке­луге шақырды.

Мемлекеттер басшылары екі ел­дің­ жан-жақты стратегиялық ынты­мақтас­тығын жаңа деңгейге шығара­тын нә­тижелі келіссөз жүргізді. Қытай Төрағасы атап өткендей, бұл кездесу мемлекеттер арасындағы алдағы 30 жылдағы алтын дәуіріне жол ашты. Достық әрі өзара түсіністікке негізделген кездесу со­ңында Қасым-Жомарт Тоқаев Си Цзинь­пинді елімізге мемлекеттік сапармен ке­луге шақырды. Қытай басшысы осы жыл­дың қыркүйек айында қазақ халқының қонақ­жайлылығына куә болады деген үміттемін, – деді ол.

Сонымен қатар Қазақстан Президентінің жұмыс сапары ҚХР Төрағасының Олимпиаданың ашылу салтанатына келген делегация­лар басшыларына арналған ресми қабылдауымен аяқталды.

Қасым-Жомарт Тоқаев осы қабылдау барысында БҰҰ Бас хатшысы Антониу Гутерришпен, ДДСҰ Бас директорымен, сондай-ақ Польша, Сингапур, Қатар, Пәкістан және Орталық Азия елдерінің басшыларымен әңгімелесті. Олар Мемлекет басшысының «қасіретті қаңтар» кезінде жағдайды тұрақтандыру үшін қабылдаған шешімдеріне қолдау білдірді, – деді Берік Уәли.