"Сапалы интернетпен қамту үшін көп инфраструктура қажет" – министрлік
Үкімет отырысының қорытындысы бойынша өткізілген баспасөз конференциясында еліміздегі интернет сапасының нашарлығы мәселесі көтерілді, деп хабарлады Elordainfo.kz.
«Егер БҰҰ рейтингісін алатын болсақ, біз цифрлық қызмет көрсету бойынша 24-ші орындамыз. Ал интернеттің сапасы жөнінен 190 мемлекеттің ішінде 41-орындамыз. Біздің жеріміз кең әрі халықтың орналасу тығыздығы төмен екенін білесіздер. Сондықтан өзге елдегі станция 100 мың тұтынушыны қамти алса, біздегі бір станция 2 мың тұтынушыны ғана қамти алады. Елді мекендер мен қалалар өсіп келеді, тұтыну көбейді, ал сапалы интернетпен қамту үшін көп инфраструктура қажет. Бұл тұрғыда жұмыс істеп жатырмыз. Мысалы, 2023 жыл мен 2024 жылды салыстырсақ, интернет сапасы 120 пайызға өсті десек болады. 5 жыл бұрын көлікте отырып Youtube қарау ерекше көрінсе, қазір қарап отырған видеомыз сәл кідірсе, шағымданып жатамыз», - деп жауап берді бұл сауалға Цифрлық даму, инновациялар және аэроғарыш өнеркәсібі министрлігінің Телекоммуникация комтиеті төрағасы Дамир Сейсембеков.