«Көп адам кірсе, істемей қалады»: журналистер eGov істемей қалғанын сынады
Бұл мәселе Үкімет отырысының қорытындысы бойынша баспасөз конференциясында көтерілді, деп хабарлады Elordainfo.kz.
«Үкімет отырысында министр қағазбастылықтың жойылғанын айтты. Бірақ eGov істен шығып, баламызды 1-сыныпқа кезекке қою үшін өтінішті енгізе алмай отырмыз. «Бүгін сағат 15.00-те сервис қалпына келеді» дедіңіз. Бірақ 15.00-де де дәл осылай болады. Елдің бәрі сервиске кіреді. eGov қайта «құлайды». Егер тағы солай болса, біз үйдің қасындағы мектепке баламызды тіркеуге үлгермей қаламыз да, ақыры 2-3 км жердегі мектепке апаруға мәжбүр боламыз. Сонда кім кінәлі болады бұған? Неге алдын ала дайындалмайсыздар?» - деп сұрақ қойды журналист.
Бұл сауалға Цифрлық даму, инновациялар және аэроғарыш өнеркәсібі вице-министрі Ростислав Коняшкин жауап берді.
«Сервис 15.00-те қосылады. Жүйе жүктемені көтеретін болады. Біз бұл сервистің дұрыс жұмыс істеуіне жауап береміз. Ата-аналар аталған уақытта eGov-ке кіріп, мемлекеттік қызметті ала алады», - деп жауап берді Ростислав Коняшкин.
Сауал қоюшы «осындай қызметтердің бірқатарын дәстүрлі тәсілге ауыстырса қалай болады?» деген ұсынысын айтты. Өйткені, оның айтуынша, мынадай жағдайға қарағанда баланы 1-сыныпқа тіркеу үшін мектепке аяқтай барып тіркеген анағұрлым оңайырақ.
«Мемлекеттік қызмет көрсетуді цифрландыру ісін жалғастыра береміз. Өйткені бұл ашық қызмет көрсетуді қамтамасыз етеді және жемқорлықтың алдын алуға көмектеседі. Дегенмен критикалық жағдайда бұл қызметтерді оффлайн жалғастыра беруіміз керек. Қазіргі кезде 92 мемлекеттік қызмет цифрландырылған, дегенмен бұл қызметтердің ХҚКО-да да атқарыла беруін қолдаймыз», - деді ол.