Қырғыз көкпаршылары Қазақстан құрамасына реванш өткізуді ұсынды
Қырғызстанның көк бөрі федерациясы қазақстандық спортшыларға 1 қарашада Ыстықкөл жағасында реванш өткізуді ұсынды. Бұл туралы федерация басшысы Рамис Жүнісалиев мәлімдеді, деп хабарлады Elordainfo.kz 24.kg-ға сілтеме жасап.
«Біз даулы мәселелерді шешу үшін қазақстандық тарапқа реванш ұсынғымыз келеді. Бұл ойынға көрші елдің спортшыларына Дүниежүзілік көшпенділер ойындарында болған құраммен келуді ұсынамыз»,- деді ол.
Федерация басшысының айтуынша, бұл ұсыныс Қырғызстан мен Қазақстан арасындағы спорттық байланыстарды нығайтуға, сондай-ақ әділ ойынды қамтамасыз етуге бағытталған.
Естеріңізге сала кетейік, 12 қыркүйекте V Дүниежүзілік көшпенділер ойындары аясында көкпардан финалдық бәсекеде Қазақстан мен Қырғызстан құрамалары кездесті. Бірінші кезеңнің аяқталуына 7 минут уақыт қалғанда Қазақстан құрамасының мүшесі Ұлан Байтөреев пен қырғыз көкпаршысы Қуанышбек Сұлтанұлы арасында жанжал туындап, арты спортшылардың қақтығысына ұласты.