Республикалық «SportArtFest» байқауының жеңімпаздары анықталды
Мәдениет және ақпарат министрлігінің қолдауымен өткен «Ules» жобасы аясындағы республикалық «SportArtFest» байқауы мәреге жетті, деп хабарлады Elordainfo.kz.
Байқаудың мақсаты – жастарды зияткерлік және шығармашылық тұрғыда дамыту, сонымен қатар жастар арасында салауатты өмір салтын насихаттау.
Республикалық байқаудың іріктеу кезеңіне еліміздегі 500-ден астам елді мекеннен 10 000-ға жуық жас қатысты. Үздік 20 команда финалға жолдама алды. Қатысушылар үш күн бойы зияткерлік және шығармашылық жарыстарда бақ сынасты.
Байқау қорытындысы бойынша Жетісу облысының «Tau stars» командасы 1-ші орын, Жамбыл облысының «Шу жастары» командасы 2-ші орын алса, 3-ші орынды Атырау облысының «Firdaus» командасы иеленді. Жеңімпаздар алғыс хаттармен және ақшалай сыйлықтармен марапатталды. Байқаудың жүлде қоры – 1 600 000 теңге.