Овариден алтын медаль алуға үміттіміз – Айнұр Әбсадыққызы
Астанада өтетін V Дүниежүзілік көшпенділер ойындарына санаулы күн қалды, деп хабарлады Elordainfo.kz.
Бұл ойындарда бірнеше елден келген спортшылар ұлттық ойынымыз тоғызқұмалақтан бөлек, түріктің мангала, Батыс Африка елдерінің овари атты зияткерлік ойындарынан өзара мықтыны анықтайды. Тоғызқұмалақтан ұлттық құрама бас бапкері Айнұр Әбсадыққызы ел намысын қорғайтын спортшылардың овариден алтын медаль алуға қауқарлы екенін айтты.
«Овари ойыны Қазақстанда қатты дамымаса да, халықаралық жарыстарда спортшыларымыз жақсы өнер көрсетіп жүр. 2006 жылғы Лондон зияткерлік ойындар олимпиадасында, Канн фестивалінде жүлде алды. Қазақстан құрамасы 2018 жылы Қырғызстанда өткен IIІ Дүниежүзілік көшпенділер ойындарында овариден жарқын жеңіске жетті. Овариден ұлттық құраманың үздік спортшылары ел намысын қорғап, екі алтын медаль жеңіп алды. Әсел Далиева мен Диана Кенина командалық есепте алтын медаль алса, әйелдер арасында жекелей есепте Әсел Далиева алтын жүлдеге ие болды», – деді тоғызқұмалақтан ұлттық құраманың бас бапкері Айнұр Әбсадыққызы.
V Дүниежүзілік көшпенділер ойындарында овариден ел намысын қорғайтын спортшылар анықталды. Олар – тоғызқұмалақтан ҚР еңбегі сіңген спорт шебері Серік Ақтаев, халықаралық дәрежедегі спорт шебері Ернұр Мерешев, тоғызқұмалақтан ҚР еңбегі сіңген спорт шебері Әсел Далиева және тоғызқұмалақтан халықаралық дәрежедегі спорт шебері Аңсаған Қожанәсіп.
Бас бапкер Айнұр Әбсадыққызы Африка елдері, Антигуа-Барбуда және Қырғыз Республикасының спортшыларын овариден басты қарсыластарымыз деп есептейді. Ұлттық құрама спортшылар playok.com платформасында онлайн дайындалып жатыр.