Әлем чемпионаты: Қазақстан мен Португалия ойынын қайдан көруге болады
Бүгін футзалдан Қазақстан құрамасы Өзбекстанда өтіп жатқан әлем чемпионатының 1/8 финалдық кезеңі аясында Португалияға қарсы ойнайды, деп хабарлады Elordainfo.kz.
Аталмыш турнирдің D тобында сынға түскен Қазақстан құрамасы 7 ұпай еншілеп, екінші орынмен плей-оффқа шыққан болатын.
Алғашқы ойында Испаниямен 1:1 есебімен тең түссе, Ливияны 4:1 есебімен жеңген еді. Ал Жаңа Зеландияға қарсы үшінші ойында 10:0 есебін тіркеп, ірі жеңіске қол жеткізген болатын.
Матч Астана уақыты бойынша сағат 20:00-де басталады. Ойынды Qazsport телеарнасынан тікелей эфирде көруге болады.
Айта кетейік, әлем чемпионатының ширек финалы 29-30 қыркүйекте, жартылай финалы 2-3 қазанда өтеді. Ал ақтық сын 6 қазанда Ташкентте өтеді деп жоспарланған.