Астаналықтар 2024 жылғы әлем чемпионатында неше жүлде жеңіп алды
2024 жыл тек елордалықтар үшін ғана емес, жалпы отандық спортшыларға өте маңызды жыл болды. Осы орайда Elordainfo.kz сайтының тілшісі ересектер арасындағы жаһандық додаларда жүлде алған елордалық спортшылар туралы айтуды жөн көрді.
Су спорты түрлерінен Қатар астанасы Дохада өткен әлем чемпионатында елордалық спортшы Эдуард Ким мен Наргиза Болатова әртістік жүзуден техникалық аралас бағдарламада алтыннан алқа тағып, тарихи нәтижеге қол жеткізді. Бұл Қазақстан атлеттерінің су спорты түрлерінен әлем чемпионатында қол жеткізген тарихи алтын медалі.
Естеріңізге сала кетсек, 2023 жылы да Эдуард Ким жеке бағдарламада ел тарихындағы бірінші қола жүлдені иемденген еді.
Күрес түрлерінен Тиранада (Албания) өткен Олимпиада бағдарламасына кірмейтін әлем чемпионатында Жәмила Бақбергенова күміс жүлде жеңіп алды. Осылайша, ол қазақ қыздары арасынан әлем чемпионатының 4 жүлдесін алған алғашқы балуан атанды.
Олимпиадалық емес спорт түрлерінен де бірқатар жүлде бұйырды. Ашихара каратэден 14-18 қараша аралығында Мошонмодьяроварда (Мажарстан) өткен әлем чемпионатында Саян Жанділдин, Жанболат Ибрагимов, Абдулла Мусин топ жарса, Дархан Сарсекеев, Руфина Рымханова, Екатерина Гагарина, Дамир Қасенов күміс жүлдегер атанды. Ал Арина Ястребова қола жүлдемен марапатталды.
Унифайттан 25-30 қараша аралығында Антальяда (Түркия) ұйымдастырылған әлем чемпионатында Нұртас Жұмағазыұлы, Мирас Жеңісов қарсылас шыдатпаса, Асхат Жылысбеков 3-орынға тұрақтады.
Муайтайдан 31 мамыр-10 маусым аралығында Патры (Грекия) қаласында өткен әлем чемпионатында Алмас Сәрсембеков күміс медальға ие болды.
Пауэрлифтингтен 21 мамыр-1 маусым аралығында Остин (АҚШ) қаласында өткен әлем чемпионатында Азат Сәлмен 3-орын алып, жүлдегерлер қатарынан көрінді.