Астаналық хоккейшілер Қытайда өткен турнирде қола жүлдегер атанды
Астананың әйелдер хоккей академиясының спортшылары алғаш рет жастар арасындағы шайбалы хоккейден «Мұз бен қардан Жібек жолы» халықаралық жарысына қатысып, қола медаль жеңіп алды. Турнир Қытай Халық Республикасының Цзянсу провинциясында өтті, деп хабарлады Elordainfo қала әкімдігінің ресми сайтына сілтеме жасап.
Елордалық команда турнирге осы жылдың қаңтар айынан бастап дайындалды.
Академия директоры Бұлбұл Қартаңбайдың айтуынша, жарыс алдында қиындықтар болған. Атап айтқанда, тиісті жас мөлшеріндегі өзге әйелдер командалары тіркелмегендіктен ерлермен бәсекелесуге мәжбүр болды. Мұндай қиындықтарға қарамастан, қыздар командасы мықтылығын көрсетіп, үшінші орынға ие болды.
«Астананың әйелдер хоккей академиясы спортшыларының Қытайға сапары тарихи оқиға болды. Бұл олардың алғашқы халықаралық турнирі еді, әсіресе жас спортшыларымыздың толқуы ерекше байқалды. Балалардың біразы, тіпті шетелге алғаш рет шығып тұр, тиісінше бұл – олар үшін халықаралық деңгейдегі алғашқы тәжәрибе», – деді Бұлбұл Қартаңбай.