Астанада футболдан республикалық турнирдің жеңімпаздары анықталды

№8 Балалар мен жасөспірімдердің мамандандырылған олимпиадалық резерв спорт мектебінің жасыл алаңында өткен доп додасына 16 команда қатысып, финалда «Фабрика футбола» командасы FC Family-ді (Астана қаласы) 3:1 есебімен сенімді түрде жеңді.

«Үш күнге жалғасқан турнир қызықты өтті. Бірнеше жаңа қарсыластар болды. Атап айтсам, «Елімай» (Абай облысы), RB Arman (Павлодар облысы). Бұған дейінгі турнирде чемпион болғанымызды ескерсек, қайтадан 1-орын алу қиынға соқты. Финалда FС Family командасын 3:1 есебімен жеңіп, бір гол соқтым. Өзге ұжымдарға қарағанда шабуылда және қорғаныста жақсы ойнайтынымызбен ерекшеленеміз», - деді топ жарған «Фабрика футбола» командасының мүшесі Диас Сайлаубек.

Турнирдің қорытындысы бойынша «Фабрика футбола» командасы 1-орын, FC Family (Астана қаласы) күміс жүлдені, RB Arman (Павлодар облысы) қола жүлдені иеленді.

Сондай-ақ жас футболшылар «Үздік қорғаушы», «Үздік ойыншы», «Үздік қақпашы», «Үздік шабуылшы», «Үздік жартылай қорғаушы» секілді номинациялармен марапатталды:

Қақпашы: Нұрасыл Қапас (RB Arman);

Қорғаушы: Ерхан Берікболсын («Фабрика футбола»);

Жартылай қорғаушы: Жұмабек Хазрет (RB Arman);

Шабуылшы: Дияр Нұркен (FC Family);

Үздік ойыншы: Қанат Ақназар («Фабрика футбола»).

Айта кетейік, 20-22 желтоқсан күндері аралығындағы доп додасына Астана қаласынан бөлек, Алматы қаласы, Шығыс Қазақстан облысы, Абай, Павлодар, Қарағанды, Ақмола, Қостанай облысының жас спортшылары қатысты.