Астанада балаларды спорт секцияларына қабылдау басталады
Астана қаласы әкімдігінің «Мемлекеттік спорттық тапсырысты іске асыру дирекциясы» КММ балаларды спорт секциясына қабылдау кезегінің ашылатынын мәлімдеді, деп хабарлады Elordainfo.kz Астана қаласы әкімдігінің ресми сайтына сілтеме жасап.
Қабылдау 28 қараша күні сағат 15.00-де басталып, 30 қараша күні сағат 00.00-де аяқталады.
«2021 жылғы 27 сәуірдегі №120 бұйрықтың 2 Параграфы 10 тармақшасына сәйкес, баланың заңды өкілінің өтініш беруі оның жеке өзі немесе баланың заңды өкілдеріне берілген сенімхат бойынша жүзеге асырылатынына назар аударған жөн. Осы талаптың бұзылуы анықталған кезде ақпараттық жүйе кезектегі өтінішті және ол бойынша берілген ваучерді жояды.
Кезекті бөлу 2021 жылғы 27 сәуірдегі №120 бұйрықтың 12-тармағына сәйкес тоқтатылады. 1 желтоқсаннан 31 желтоқсанға дейін өтінімдерді қабылдау, орындарды бөлу және ақпараттық жүйенің ваучерлерін беру тоқтатылады.