2024 жылы ат спортында қандай жетістіктер тіркелді
Ұлт рухын асқақтататын ерекше спорт түрі – ат спортында биыл Астана қаласы үшін ғана емес, республикамыз үшін де өте маңызды жыл болды. Elordainfo.kz сайтының тілшісі осы спорт түріне тоқталғанды жөн көрді.
Бұл спорт конкур, бәйге, көкпар сияқты көптеген түрлерді қамтиды. Бірақ ол тек шабандоздар мен аттар үшін кәсіби жарыс қана емес, сонымен қатар мәдени және спорттық іс-шара ретінде де ерекше маңызға ие. Оның аясында өткен әрбір жарыс ұлттық рухты көтеріп, халықтың қызығушылығын арттырып келеді.
Елімізде ат спортына ерекше назар аударылуда. Бұл бағыт мемлекеттік деңгейдегі басымдықтардың біріне айналды. Осыған орай, 2024 жылы ат спортынан Астанада көптеген ауқымды іс-шаралар ұйымдастырылды. Солардың бірнешеуін атап өтсек:
- Халықаралық әйелдер күніне орай әйелдер арасында конкурдан жарыстар;
- Астана қаласының кубогы атты арнайы олимпиадалық бағдарлама бойынша ашық жарыс;
- Елорда күніне арналған ат жарысы (конкур);
- Қала күніне арналған «Елорда кубогы» бәйгесі;
- Республика күні мен мәслихаттардың құрылғанына 30 жыл толуына арналған ұлттық ат спорты фестивалі;
- Қазақстан Республикасының Тәуелсіздік күніне арналған конкур бойынша қалалық жарыстар.
Ат спортындағы ірі іс-шаралар:
8 шілдеде Астана маңындағы Талапкер ауылында өткен бәйге шабандоздар мен көрермендер үшін ұмытылмас күнге айналды. Қатысушылар 7 шақырымнан 22 шақырымға дейінгі қашықтықта жарысты. Жарысқа еліміздің барлық өңірлерінен келген шабандоздар қатысып, жалпы жүлде қоры 30 миллион теңгені құрады. Сонымен қатар жарыс соңында 2 500 көрерменге арналған лотерея ойнатылып, жеңімпаздар тұрмыстық техникаға ие болды.
Дүниежүзілік көшпенділер ойындары:
Астана қаласында өткен V Дүниежүзілік көшпенділер ойындары ат спортының мәртебесін жаңа деңгейге көтерді. Бұл жарыста аламан бәйге, жорға бәйге, топ бәйге және құнан бәйге түрлері өтті. Нәтижесі:
Аңсар Арыстанбек «Айқабақ» атты тұлпарымен аламан бәйгеде жеңіске жетті;
Ерұлан Тілеуғалиұлы «Ақжауын» тұлпарымен жорға бәйгеде екінші орын иеленді;
Бақтыбай Сержан «Холибой» тұлпарымен топ бәйгеде бірінші орынға шықты.
Республика күні мен ұлттық спорт фестивалі:
10-12 қазан күндері Астанада ұлттық спорт фестивалі аясында солтүстік өңірдің ересек шабандоздары арасында көкпар турнирі өтті. Бұл шара көкпар өнерін насихаттау және үздік шабандоздарды анықтау мақсатында ұйымдастырылды. Турнирдің жалпы жүлде қоры 20 миллион теңгені құрады.
2025 жылғы жоспар:
2025 жылы Астанада ат спортына қатысты 10 ірі жарыс өткізу жоспарланған. Оның ішінде бәйге, көкпар және конкур жарыстары бар. Іс-шаралардың негізгі бөлігі «Қазанат» ипподромында өтеді деп жоспарлануда. Әр турнирге арналған жүлде қоры 30 миллионнан 75 миллион теңгеге дейін жетеді.
Бұл іс-шараларды өткізу үшін «Астана көкпар», «Тұлпар», «Құлагер», Prestige club сияқты беделді спорт клубтары дайындық жұмыстарын бастап кетті.