«Баламды қайтар»: Алматы облысы тұрғыны туған баласын бір көруге зар болып отыр

Алматы облысында тұрып жатқан Жанерке Табиғаттың он шақты жыл отасқан күйеуі тастап кеткенімен қоймай, тұңғышын тартып алып кеткен. Содан бері баласын көрмегеніне екі жылдан асқан.

«Көпбалалы жалғызбасты анамын. Осыдан 2,5 жыл бұрын жолдасым тастап, басқа әйелге кеткен еді. Содан бері пәтерден-пәтерге тентіреп жүрміз. Не алимент төлемейді, не көмек көрсетпейді. Өзі де, алған әйелі де қоқан-лоққы көрсетіп, тұңғыш ұлымды көрсетпей не сөйлестірмей, ешқандай амалым қалмады», - деді Жанерке Табиғат.

Кейіпкердің айтуынша, 2022 жылы ауруханаға кеткен кезінде жолдасы 8 жастағы тұңғышын алып, өзге балаларын тастап, басқа әйелге кеткен. Іздеп барайын десе, мекенжайын біле алмаған.  Ол кезде енесімен тұрған, үлкен кісі «сабыр қыл, келетін шығар» дегесін көніп отырған. 2023 жылы күйеуімен қайта татуласып, 5-ші баласына аяғы ауырлайды. Әйтсе де жолдасы қайтадан кетіп қалады. Ал оның екінші әйелі мұның телефон нөмірін бұғаттап, баласының анасына жазуына мүмкіндік бермейді екен. Ақыры болмаған соң заңды түрде ажырасады. «Балалар анасында қалдырылсын» деген соттың үкімімен бұрынғы күйеуі тұрып жатқан мекенжайға анасын ертіп барады. Дегенмен өзі де, анасы да әлгі әйелден таяқ жеп кейін келеді.

Кейін бағдарламаның, заңгерлердің, полицияның араласуымен ғана баланы қайтаруға қол жеткізеді.

«Жанеркенің жұбайының ісі заң алдында да, ар алдында да дұрыс емес. Соттың шешімі бар. Бұрынғы күйеуі мұны біледі. Балаларына қарамайтын, жаны ашымайтын, алимент төлемейтін, анасына баласын көрсетпейтін адамды қалай деп айтуға болады? Ол адам жауапкершіліктен жұрдай адам ғой. Есіктерін ашпай, баланы бермей бізге көп кедергілер келтірді. Полиция қызметкерлерін шақырып, баланы алдық. Одан соң кітаптары мен жеке заттарын бермей қанша тұрды. Бала бірден «анамды сағындым, анаммен тұрғым келеді» деп айтты», - деді бұл туралы заңгер Нұрболат Ибраев.

Келіншектің тұрмыс жағдайы да мәз емес. Үйелмелі-сүйелмелі кішкентай балаларымен біреуідің сарайын жалдап тұрып жатыр. Екі мамандығы бар ол жұмысқа шығайын десе, балаларына қарайлайтын адам жоқ, күйеуі алимент төлемегенімен қоймай, оған несие алдырып, қарызын мойнына іліп кеткен. Өзі жиһаз жасайтын жеке кәсіпкер болса да, кәсібін жасырып, екінші әйелінің атына жазған. Тек соттың шешімімен ғана көлікті қайтарып, бірнеше рет соғылған техниканы төмен бағаға әрең өткізген. Алайда несие толық өтелмеген соң банк оның шотын «арестке» қойған. Жанеркеге Моңғолияда тұратын анасы ғана келіп көмектеседі екен. Дегенмен зейнеткер адамның бөліп беретін өзге ештеңесі жоқ. Ал отынмен ғана жылитын аңғал-саңғал сарай суық әрі ескі. Сол өңменнен өткен ызғардың керісінен бар баласы аурушаң. Ал 1 жасар кенже қызы өкпесі қабынып қайтыс болған. Енді бір қызы жүйке жүйесінің сыр беруінен түнде төсегіне дәрет сындырып қоятын шипасы табылмайтын дертке ұшыраған.

Бағдарламада жергілікті әкімшіліктің ол тұрып жатқан үйдің жай-күйімен танысқаны көрсетілді. Ал бағдарламаға келген сол ауылдың Ақсақалдар алқасының төрағасы Әуелбек Мұсаханұы ауылда мұндай отбасылардың көп екенін, олардың әрқайсына үй беруге бюджетте қаражат қаралмайтынын айтты. «Бірден аспандағы айды алып берем деп айту қиын» екенін айтып, дегенмен қолдан келген көмекті істейтіндерін айтты. Оның айтуынша, әкімшіліктен көмір түсіріп беру, балалардың мектепке киетін киімін алып беру сияқты көмектер көрсетіліпті. 

Ал кейіпкер өздерінің тұрғын үй кезегінде тіркеуде тұрғанмен, жақын жылдарда кезек келіп жететініне үміт жоқ екенін айтты.