Мемлекеттік қолдаудың барлық шараларын Astana Hub-қа беруді ұсынамын – министр
Мәжілістің жалпы отырысында Цифрлық даму, инновациялар және аэроғарыш өнеркәсібі министрі Жаслан Мәдиев Мемлекеттік қолдаудың барлық шараларын Astana Hub инновациялық кластерлік қорына беруді ұсынды, деп хабарлады Elordainfo.kz.
Оның айтуынша, бұл экожүйенің тиімділігін күшейтеді.
«Заң жобасының мақсаты - IT-салада жоғары нәтиже көрсеткен Astana Hub үздік тәжірибелерін біріктіру ғана емес, сонымен бірге масштабтау.
Мықты команда және жаһандық брендтермен серіктестік есебінен біз толыққанды IT-экожүйені құрдық.
Нәтижесінде 1 500 резидент жинап, оның ішінде 400 шетелдік қатысумен 28 мың жұмыс орны құрылды.
Берілген салық преференцияларының әрбір теңгесіне Astana Hub резиденттері 6,5 теңге түсім,
2,1 теңге экспорт және 1,8 теңге тартылған инвестицияларды қамтамасыз етті.
Яғни, әрбір қолдау шарасы экономикаға еселенген әсермен қайтарылады», - деді Ж.Мәдиев.