Ақтөбе облыстық драма театры Астанадағы қойылымдарына шақырады
9-11 қазан аралығында Тахауи Ахтанов атындағы Ақтөбе облыстық драма театры елорда көрермендеріне арнап гастрольдік қойылымдарын ұсынады. Гастрольдік сапар театрдың 35-маусымы аясында ұйымдастырылып отыр. Қойылымдар Астананың Қ. Қуанышбаев атындағы Қазақ ұлттық музыкалық драма театрында өтеді, деп хабарлайды Elordainfo.kz.
Репертуар:
• 9 қазан – «Әлия» (автор: Ә. Дәулетбаева, режиссер: Е. Нұртазин)
Батыр қыз Әлия Молдағұлованың ерлігі мен рухын арқау еткен бұл спектакль — көрермен жүрегіне отансүйгіштік пен адамгершілік сезімін ұялатады.
• 10 қазан – «Тазының өлімі» (автор: М. Мағауин, режиссер: М. Хабибуллин)
Қазақ әдебиетінің классигі Мұхтар Мағауиннің туындысы негізінде сахналанған бұл драма – ұлттық болмыс пен адалдық ұғымының философиялық көрінісі.
• 11 қазан – «Турандот» (автор: К. Гоцци, режиссер: А. Өмірбекұлы)
Махаббат пен тектілік, ерік пен ерлік тоғысқан итальян драматургиясының жауһары жаңа сахналық интерпретацияда көрерменге ұсынылады.
«Астана жұртымен кездесу – өңірлік театр үшін үлкен қуаныш әрі жауапкершілік. Ақтөбе театры елорда сахнасында өз шығармашылық әлеуетін танытып, ұлттық театр өнерінің өрісін кеңейтуге ниетті.
Өнер сүйер қауымды гастрольдік қойылымдарға шақырамыз!», - делінген Т. Ахтанов атындағы Ақтөбе облыстық драма театрының баспасөз қызметі таратқан ақпаратта.
Қойылымдардың өтетін орны: Астана қаласы, Қ. Қуанышбаев атындағы Қазақ ұлттық музыкалық драма театры
Күндері: 9-11 қазан, 2025 жыл
Басталуы: 19:00