Мәжіліс депутаты: Конституция – әрбір азаматқа әділдік пен сенім сыйлайтын құндылық
Конституция – тәуелсіз Қазақстанның саяси жүйесінің өзегі әрі мемлекетіміздің берік тірегі. Ол азамат пен мемлекет арасындағы келісімді бекітіп, соңғы 30 жылда тұрақтылық пен құқықтардың сенімді кепіліне айналды. Осы уақыт ішінде билік тармақтарының тепе-теңдігін сақтап, түрлі сын-қатерді еңсеруге жол ашты. Мұндай пікірді Мәжіліс депутаты Ерлан Әбдиев Elordainfo.kz тілшісіне берген сұхбатында айтты.
Елордада айтулы күнге орай Мемлекет басшысының қатысуымен «Конституция және мемлекеттілік: құқық пен болашақ диалогы» атты ғылыми-практикалық конференциясы өтті. Мұнда Қасым-Жомарт Тоқаев отыз жылда түрлі себепке байланысты Ата заңға 6 рет түзету енгізілгенін, Конституция баптарының үштен бірі жаңартылғанын айтты.
«Бүгінгі таңда Президент Қасым-Жомарт Кемелұлы Тоқаевтың бастамасымен жүзеге асып жатқан реформалар Конституция қағидаларының өміршеңдігін көрсетеді. «Күшті Президент – ықпалды Парламент – есеп беретін Үкімет» моделі халықтың күнделікті өмірінде әділетті сотта, тең мүмкіндіктерде, еркін пікір айту құқығында нақты сезілуде. Өз басым үшін ең үлкен жетістік – заңның әрбір азаматқа тең қызмет етуі», - деді депутат.
Оның айтуынша, Конституция 30 жылда мемлекетіміздің сенімді негізіне айналды.
«Ең басты жетістігі: құқық үстемдігі мен адам қадір-қасиетін қорғау қағидасы қоғамға орнықты. Нарықтық экономиканы дамыту, жекеменшік пен кәсіпкерлікті қорғау арқылы Қазақстан халықаралық бәсекеге қабілетті елге айналды. Жергілікті өзін-өзі басқарудың дамуы мен билік тармақтарының теңдігі де халықтың сенімін күшейтті. Өз көзқарасым бойынша, бұл тек бастамасы. Конституцияның әлеуеті әлдеқайда терең. Ол бізге цифрлық экономика, жасанды интеллект, инклюзивті қоғам құру сияқты жаңа белестерге жол ашады. Өткен 30 жыл тұрақтылық пен даму кезеңі болса, алдағы 30 жыл әділетке, білімге және әр азаматтың әлеуетін ашуға негізделген жаңа дәуір болады деп сенемін», - деді спикер.
Мәжіліс депутаты Ата заң күнін тойлауға қатысты пікірін айтты.
«Конституция күні мерекелік деңгейде аталып өтеді, бірақ кейде оның терең мағынасы көлеңкеде қалып қояды. Негізінде бұл күн – біздің тәуелсіздігіміздің, демократиялық таңдауымыздың, әділетті мемлекет құрудағы ортақ еркіміздің символы. Халық арасынан шыққан азамат ретінде Конституция күнін тек ресми жиындармен емес, әрбір қазақстандық өз құқығы мен мүмкіндіктерінің нақты өмірде қалай іске асатынын сезінетін мереке ретінде елестетемін. Ол үшін мектептерде, университеттерде ашық сабақтар, қоғамда пікірталастар, халықпен тікелей кездесулер жиі болғаны дұрыс. Конституцияны заң баптарының жиынтығы ретінде емес, әр азаматтың күнделікті өмірін, ар-намысын, еркіндігін қорғап тұрған тірек ретінде қабылдай білсек, мерекенің мәні де күшейе түсер еді», - деді ол.
Спикерге жастардың бойында отансүйгіштік, елжандылық сияқты қасиеттерді қалыптастыру үшін не істеу қажет деген сауалды қойған едік.
«Нағыз патриотизм ұранмен емес, күнделікті еңбектен, ел алдындағы жауапкершіліктен көрінеді. Жастардың елге адал азамат болып өсуі үшін әділетті орта мен тең мүмкіндік қажет. Әр жас, оның ішінде мүмкіндігі шектеулі азаматтар да, өз қабілетін толық іске асыра алуы тиіс. Жастарға қараған сайын еліміздің ертеңін көремін. Олар ғылымға, жаңа технологияға, елге адал қызметке ұмтылып келе жатыр», - деді Ерлан Әбдиев.
Халық қалаулысы жасанды интеллект, цифрлық технология болашақтың негізгі бағыты екенін жеткізді.
«Бүгінде Қазақстан атом электр станциясын салуға кірісті. Біз – уран өндіруде әлемдік көшбасшымыз, енді осы салада да өзімізді көрсетуіміз керек. Бұл іске жас инженерлер мен ғалымдарды тарту елге қызмет етудің нақты жолы. Сонымен бірге жасанды интеллект, цифрлық технология, жаңа инженерлік мамандықтар біздің болашағымыздың негізгі бағыты болады. Егер жастар осы білімді меңгеріп, оны ел игілігіне қолданса, Қазақстанды табиғи ресурстарымен ғана емес, ақыл-ойымен бүкіл әлем танып біледі», - деді Мәжіліс депутаты.
Сөз соңында халық қалаулысы қазақстандықтарды Ата заң күнімен құттықтады.
«Құрметті отандастар! Конституция күні құтты болсын! Бұл мереке – бәріміздің тең құқықты азамат екенімізді еске салатын ерекше күн. Мен үшін Конституция жай ғана заң емес, ол әрбір азаматқа әділдік пен сенім сыйлайтын құндылық. Мүгедектігі бар адам ретінде өз өмірімде заңның, тең мүмкіндіктің қаншалықты маңызды екенін жақсы білемін. Сондықтан бәріміз бірге бірлікті сақтап, әр шешімімізде заңды басшылыққа алып, әділ әрі қуатты Қазақстанды құруға үлес қоссақ деймін», - деді Ерлан Әбдиев.