2024 жылы көпшілікті таңғалдырған елордалықтар (I бөлім)
Астанада әртүрлі оқыс оқиғалар мен қиындықтардан адамдарды құтқарып қалған ержүрек жандар аз емес. Тіпті ұшқыр білімі, спорттағы және сахнадағы жетістігі арқылы Астана атауын асқақтатып жүргендер арамызда жүр. Elordainfo.kz тілшісі жыл басынан бері жұртшылық назарында болған астаналықтар туралы айтуды жөн көрді.
Қаңтар
Жылдың алғашқы айы жемісті басталды. Елордалық спортшы Дастан Ордабай Аустралияның Балларат қаласында өткен 2024 жылғы Virtus Oceania Road Cycling World Series велоспорт чемпионатында жеңіске жетті. Аутизм диагнозы қойылған қатысушыларға арналған жаңа II-3 санатында Дастан Ордабай екі алтын медаль жеңіп алды. Ол аутизм спектрі бұзылған алғашқы азиялық спортшы атанып, Қазақстан тарихында өз ізін қалдырды.
Астананың №3 көпбейінді қалалық ауруханасында 5 484 гр салмақпен батыр сәби дүниеге келді. Сәбидің 35 жастағы анасы бұл оның үшінші баласы екенін айтады.
Елордалық келіншек егізден кейін үшемді дүниеге әкелді. 18 қаңтарда Астана қаласындағы алғашқы үшем №2 қалалық көпсалалы аурухананың акушерлік блогында дүниеге келді. Сәбилердің анасы Ажар Қабитова жұбайымен бірге 2020 жылы дүниеге келген қыздары мен 2022 жылы туған егіз балаларын тәрбиелеп отыр.
Ақпан
Елордалық спортшылар үшін ақпан айы жеңіске толы болды. Атап айтқанда, Қатар астанасы Дохада өткен су спорты түрлерінен әлем чемпионатында ұлттық құрама сапында өнер көрсеткен астаналық спортшы Эдуард Ким мен оның жұбы алтыннан алқа тағып, тарихи нәтижеге қол жеткізді. Бұл Қазақстан атлеттерінің су спорты түрлерінен әлем чемпионатында қол жеткізген алғашқы алтын медалі.
Германияда елордалық пара дзюдошылар Ақмарал Науатбек пен Ерғали Шамей ел қоржынына 1 алтын, 1 күміс жүлде салды.
Елордалық пара спортшы Айсұлу Сүлейменова Дубай қаласында өткен жеңіл атлетикадан Dubai 2024 World Para Athletics Grand Prix 15th Fazza International Athletics Championships турнирінің күміс жүлдегері атанды.
Жүзуден ХІ Азия чемпионатында астаналық спортшылар Арсен Қожахметов пен Әділбек Мусин рекорд орнатты. Бірінші жарыс күнінде жүзу және суға секіру бәсекесінде елордалық спортшылар алдына жан салмай, алтыннан және күмістен алқа тақты.
Наурыз
Елордалық еріктілер әйелдерге 1000-нан аса қызғалдақ сыйлайды. «Астана жастары» жастар ресурстық орталығының еріктілері Халықаралық әйелдер күні мерекесі қарсаңында елорданың нәзік жанды тұрғындарын осылайша құттықтады.
Елордалық ағайынды боксшылар Париж Олимпиадасына екі жолдама жеңіп алды. Атап айтқанда, ерлер арасында аса ауыр салмақтағы 92 келідегі Айбек Оралбай мен оның сыңары 80 келідегі Нұрбек Оралбай.
Республикалық оқушылар олимпиадасында астаналық команда 5 алтын, 6 күміс, 6 қола медальді қоржынға салды.
Елордалық жас жұбайлар неке қию туралы куәліктерін «Бәйтерек» төрінде алды. 17 наурыз күні «Бәйтерек» монументінің панорамалық залында жас жұбайларды заңды некелерімен, ал отбасылық жұптарды «Алтын тойларымен» құттықтады.
Сәуір
Астанада республикалық «Таза Қазақстан» экологиялық акциясы аясында аты аңызға айналған футболшы Коло Туре мен Фадига Халилу көшет отырғызды.
Елордалық Айбота Ертайқызы Францияның Тье қаласында өткен көркем гимнастикадан Гран-при кезеңінде 3 медаль иеленді.
Астаналық бұрымдылар Динара Сәдуақасова, Амина Каирбекова мен Меруерт Камалиденова шахматтан «Үздік команда» аталымын жеңіп алды.
Түркияның Анталья қаласында пара дзюдодан дәстүрлі халықаралық Grand Prix – 2024 додасында елордалық спортшы Ерғали Шәмей қола жүлдегер атанды.
Елордалық спортшы Ризабек Айтмұхан Бішкекте күрестен өткен Азия чемпионатында күміс жүлдеге ие болды.
Мамыр
1 мамыр – Қазақстан халқының бірлігі күні мерекесіне орай Астана қаласы Жастар саясаты мәселелері басқармасы «Астана жастары» жастар ресурстық орталығымен бірлесіп, бірлік пен татулықтың мерекесінде «Бауырсақ біріктіреді» атты акцияны ұйымдастырды. Елордалық волонтерлер мерекеде бауырсақ пен тәттілер таратты.
Астанада «Таза Қазақстан. Астана – тазалық пен тәртіптің үлгісі» атты ауқымды экологиялық акциясына алты ай бұрын бүйрек трансплантациясын жасаған қала тұрғыны Бекболат Шерниязов қатысып, игі бастамаға қолдау білдірді.
Елордада 7-сынып оқушысы Ақан Әкімжанов ерлік жасап, тұрғын үйдің 4-қабатындағы балконнан құлай жаздаған баланы құтқарып қалды. Қала әкімі Жеңіс Қасымбек мектеп оқушысын батыл әрекеті үшін марапаттады. Сонымен қатар Төтенше жағдайлар министрі Шыңғыс Әріновтың бұйрығына сәйкес адам құтқару кезінде батылдық пен өжеттілік танытқаны үшін Ақан Әкімжанов марапатқа ие болды.
Астанада №52 мектеп-гимназияның 11 «А» сынып оқушысы Марлен Көшербай суға батып бара жатқан бес жасар баланы құтқарып қалды. 12 мамыр күні күндіз сағат 11 шамасында Марленді қарындасы оятып, өзенге бір баланың батып бара жатқанын айтады. Марлен бірден үйдің жанындағы өзенге қарай жүгіріп, суға батып бара жатқан бүлдіршінге көмекке ұмтылып, судан аман-есен шығарып алған. Марлен көрсеткен ерлігі мен батылдығы үшін Астана қаласы білім басқармасы мен Ақмола облысының ТЖ департаментінің атынан марапатталды.
Маусым
Satisfaction фестивалінің қатысушылары іс-шараны өткізу кезінде қоқыс жинады, осылайша «Таза Қазақстан. Астана – тазалық пен тәртіптің үлгісі» ауқымды экологиялық акциясына қолдау көрсетті.
20 жастағы елордалық гроссмейстер Қазыбек Нөгербек Үндістанда шахматтан әлем чемпионы атанды. Ол 20 жасқа дейінгі жасөспірімдер арасындағы FIDE World Junior (Open & Girls) Chess Championships - 2024 әлем чемпионатында алтын жеңіп алды.
Елордалық өрт сөндірушілер көп қабатты тұрғын үйде өрт сөндіру кезінде 7-қабаттағы балконнан әйел адамды құтқарды. Астана қаласы ТЖД №2 мамандандырылған өрт сөндіру бөлімінің бөлімше командирі Бағлан Бекшенов пен сол бөлімнің жүргізуші Қадыр Өмірзақовты «Өртте көрсеткен қайсарлығы үшін» медалімен марапаттады.
Материалдың жалғасын келесі шығарылымнан оқи аласыз.