«Жасай бер, қазақ елі!»: Астана филармониясы мерекелік бағдарлама ұсынды
Елорданың Еркеғали Рахмадиев атындағы Мемлекеттік академиялық филармониясының концерт залында Қайролла Жұмакенов атындағы үрлемелі аспаптар оркестрі «Жасай бер, қазақ елі!» атты мерекелік концертін ұсынды. Кеш Қазақстан Республикасының Конституциясына 30 жыл толуына орайластырылды, деп хабарлайды Elordainfo.kz.
Ата заң – еліміздің басты құндылығы, мемлекетіміздің тұрақтылығы мен бірлігінің негізі. Осы айтулы датаға арналған концертте елге белгілі вокалистер мен талантты музыканттар өнер көрсетті.
Кеш барысында көрерменге патриоттық рухтағы танымал әндер мен үрлемелі оркестрге лайықталған классикалық және эстрадалық шығармалардан тұратын мазмұнды бағдарлама ұсынылды.
Концерт шымылдығы Қазақстан Республикасының Мемлекеттік Әнұранымен ашылды. Одан кейін С. Бәйтерековтің «Қазақстан», Е. Брусиловскийдің «Шашу», К. Күмісбековтің «Биші қайың», Ш. Қалдаяқовтың «Бақыт құшағында», «Ақерке – Ақжайық», «Қайықта» сияқты кеңінен танымал туындылар орындалды.
Сонымен қатар Абай Құнанбайұлының өлеңдеріне жазылған шығармалар мен Құрманғазының әйгілі «Адай» күйі оркестр орындауында жаңаша сипат алды.
Кеште өнер көрсеткен орындаушылар қатарында Арайлым Рахымқызы, Бибігүл Жанұзақ, Парасат Отан, Ақбота Құснадин, Айдын Жұмабаев, Әкімхан Маженов, Қымбат Жамбылбек, Құралай Мейрамбек және тағы басқа өнер майталмандары болды.
Концерттің шарықтау шегінде Е. Хасанғалиевтің «Атамекен» әні үрлемелі оркестр, Халықаралық байқаулардың лауреаты Нұрсәт Алмас және Камералық хор қатысуымен орындалды.
Оркестрдің көркемдік жетекшісі Никита Почиталин, эстрадалық вокал бөлімінің көркемдік жетекшісі Дана Сатаева, классикалық вокал бөлімінің көркемдік жетекшісі Роза Шоткалиеваның басшылығымен филармония әртістері ел тарихындағы маңызды белес – Конституция күніне арналған концерт арқылы Отанға деген сүйіспеншілікті өнер тілімен өрнектеді.
