Елордалық студенттер «Worldskills2024» чемпионатында үздік нәтиже көрсетті
Астаналық колледж студенттері «Worldskills2024» чемпионатында жоғарғы нәтижеге қол жеткізді, деп хабарлады Elordainfo.kz қалалық Білім басқармасына сілтеме жасап.
14-18 қараша аралығында өткен lX республикалық «WorldSkills Kazakhstan-2024» чемпионатына 550-ден астам студент қатысты. Олар 30 құзіреттілік бойынша бір-бірімен жарысып, білімі мен тәжірибелерін ортаға салды.
Олардың арасында электромонтаж, энергетика, кірпіш қалау, шанақты жөндеу, аспаздық және ресторан ісі, IT шешімдері, WEB-технологиялар, мобильді робототехника, мехатроника, прототиптеу секілді құзыреттіліктер болды.
Барлық командалық есеп бойынша Астана қаласының студенттері 5 алтын, 1 күміс, 5 қола медаль, сондай-ақ кәсіпқойлық үшін 6 медальон алып еліміз бойынша командалық есепте бірінші орынға табан тіреді.
Республикалық байқаудың қорытынды кешіне Оқу-ағарту министрі Ғани Бектайұлы қатысып, барлық студенттерді жарқын белестерімен құттықтап, ел мерейін арттыра беруді тіледі.
Айта кетейік, жеңімпаздар келесі жылы Данияда өтетін EuroSkills чемпионатына қатысу үшін ұлттық құрамаға кіру мүмкіндігіне ие болды.