Елордада қар тазалауға 1 500-ге жуық арнайы техника шықты
Астанада коммуналдық қызметтер қар күреу бойынша тәулік бойы тоқтаусыз жұмыс істеп жатыр, деп хабарлады Elordainfo.kz.
27 желтоқсанда күндізгі ауысымға 1 500-ге жуық арнайы техника мен 2,6 мыңнан астам коммуналдық қызметкер қар күреуге шықты.
Астанадан өткен түнде 2 765 рейспен 37 968 текше метр қар шығарылды.
Қыс мезгілі басталғалы полигондарға 138 644 рейс арқылы 1 780 577 текше метрден астам қар шығарылды.
Ең алдымен, ережеге сәйкес, жолдарда кептеліс болмас үшін қозғалысы өте қарқынды орындар тазартылады. Сондай-ақ, қарқындылығы орташа учаскелер – алаңдар, вокзал маңы аумақтары, тротуарлар, әлеуметтік нысандарға кірме жолдар және т.б. тазартылады.
Орталық көшелерді, жолаушылар көлігі маршруттары жүретін орындарды, аялдамалар мен тротуарларда тазалау да басымдыққа ие.
Қалада бірнеше жабдықталған қар полигоны бар. Олар самосвал техникасының нөмірлік белгілерін оқу жүйесімен жабдықталған, мұнда бейнебақылау камералары орнатылып, жарықтандыру қосылған.
«Елорда тұрғындары мен қонақтарынан жолдарда абай болуды, қауіпсіздік ережелерін сақтауды, дауылды ескерту болған жағдайда алыс сапарларға шықпауды сұраймыз.
Төтенше жағдай туындаған кезде «112» нөміріне хабарласыңыз», - делінген хабарламада.