Елорда ауруханасында ондаған күрделі операция тегін жасалды
Соңғы жеті айда елордалық №2 көпсалалы балалар ауруханасында 500 мың теңгеден асатын ондаған тегін операция жасалды. Мұндай жоғары технологиялық медициналық көмек тұрғындарға міндетті әлеуметтік медициналық сақтандыру аясында қолжетімді болып отыр, деп хабарлады Elordainfo.kz Астана қаласы әкімдігінің ресми сайтына сілтеме жасап.
Көпсалалы қалалық №2 балалар ауруханасы – елордадағы жалғыз медициналық ұйым, мұнда балаларға мамандандырылған хирургиялық көмек көрсетіледі. Мұнда оториноларингология, нейрохирургия және ортопедия саласындағы күрделі әрі жоғары технологиялық операциялардың толық спектрі жасалады.
Жоғары технологиялық ота жасауға көпсалалы дәрігерлер тобының қатысуы, заманауи жабдықтар мен импланттарды қолдану және инновациялық емдеу тәсілдері қажет. Мұндай араласулардың құны миллиондаған теңгеге жеткенімен, балалар үшін олар толықтай тегін жүргізіледі.
Ауруханада балаларға есту қабілетін қайтаратын кохлеарлық имплантация жасалады.
2024 жылы стационар жағдайында 827 млн теңгеге 108 операция жасалған. Соңғы 7 айда 536 млн теңгеден асатын 68 операция өтті.
Нейрохирургия саласында да күрделі оталар жасалады. Бас сүйек жарақаттары, ісік немесе туа біткен патология кезінде арнайы пластиналар қолданылады. Бұл ота дәрігерден зергерлік дәлдікті, ерекше тәжірибені және қымбат жабдықты талап етеді. Мұндай араласулар балалардың өмірін сақтап, ауыр мүгедектіктің алдын алады. Сондай-ақ, мамандар нейронавигация мен нейромониторинг арқылы ми ісіктеріне ота жасайды.
2024 жылы 68 млн теңгеге 39 ота жасалған. Биылғы жеті айда 38 млн теңгеге 21 ота өтті.
2024 жылдың соңында ауруханада жаңа қызмет түрі – жамбас-сан буынын эндопротездеу енгізілді. Дәрігерлер алғашқы оталарды 4,6 млн теңгеге жасады.
«Бүгінгі күнге дейін біз жамбас-сан буынын ауыстыру бойынша 7 операция жасадық. Бұл протездерді арнайы қор сатып әперді. Ал емдеудің өзі әлеуметтік медициналық сақтандыру қоры есебінен жүргізілді. Балалар ортопедиясында бірнеше бағыт бар, ең қымбаты – онкопротездеу, ол денсаулық сақтау министрлігі тарапынан қамтамасыз етіледі. Бұдан бөлек, біз микрохирургиялық оталар жасаймыз, оның құны шамамен 800 мың теңге. Жыл соңына дейін тағы үш жамбас-сан буынын ауыстыру операциясын жасау жоспарлануда, – деді ортопедия бөлімінің меңгерушісі Ағабек Шықынаев.