Берілген уәде орындалды – депутат

Биыл Астанадағы №4 сайлау округіне қарасты сайлаушылардың көтерген мәселелері оң шешімін тапты. Бұл туралы AMANAT партиясының атынан Алматы ауданы, №4 сайлау округі бойынша Астана қалалық мәслихат депутаты  Мәдина Әжікенова айтты, деп хабарлады Elorda.info.

Жыл басынан бері өзімнің сайлау округімде орналасқан 26 тұрғын үй кешеніне барып, тұрақты түрде сайлаушыларыммен көшпелі кездесулер өткіздім. Әр айдың бірінші сейсенбісінде елорда тұрғындарын жеке мәселелері бойынша қабылдау болды.  Осы күнге дейін 60-қа жуық жеке қабылдау өтті. Жыл сайын жаңа оқу жылы қарсаңында өткізілетін AMANAT партиясының «Мектепке жол» акциясына белсенді қатысып, 25 оқушыға мектепке арналған барлық құрал-жабдығы бар портфель сыйладық, - деді спикер.

Мәдина Берікболқызы  осы уақытқа дейін мәслихат қабырғасында 30-ға жуық депутаттық сауал жолдаған. 

АMANAT партиясы Астана қалалық филиалының Отбасы және халықты әлеуметтік қорғау мәселелері жөніндегі аймақтық қоғамдық кеңесінің мүшесі ретінде білім беру мекемелерінің қауіпсіздік кешеніне мониторинг жүргізу мақсатында 6 мектепке барып, білім беру ошақтарының жай-күйімен таныстым. Осы уақыт аралығында 30 депутаттық сауал жолдадым. Депутаттық сауалдарымның 17-сі сәтті орындалып, сайлаушылар мәселесі оң шешімін тапты. Қалған 13 депутаттық сауалым орындалу үстінде, - деді мәслихат депутаты. 

Спикер қарттар күніне орай өткен жобаларға да белсенді түрде атсалысқан. 

«Ардагерлерді ардақтайық» жобасының аясында 9 мамыр - Жеңіс күніне орай өзімнің №4 сайлау округімде тұратын 3 соғыс ардагерімен кездесіп, бүгінгі жас ұрпаққа сыйлаған бейбіт заман үшін алғысымды білдірдім. Одан бөлек,  1 қазан - Қарттар күніне орай ЖК Millennium Park бастауыш партия ұйымының 24-ке жуық құрметті ардагерлеріне мерекелік көңіл-күй сыйлап, ақ дастархан жайдым, - деп бөлісті ол. 

Мәслихат депутаты партияның  «Халықпен бірге» сайлауалды бағдарламасын іске асыру аясында 2024 жылы аяқталуы тиіс көпір құрылысы биыл уақытынан бұрын аяқталып, Тәуелсіздік даңғылында Есіл өзені арқылы өтетін автомобиль көпірі ашылғанын айтты. 

Сонымен қоса, халық қалаулысы №4 сайлау округінде тұратын сайлаушыларым көтерген келесі мәселелер оң шешім тапқанын жеткізді. 

Қордай көшесі жағынан автотұрақ орны асфальтталды.Балалар алаңы мен футбол алаңына және Р.Қошқарбаев 40 көшесінде балалар алаңына жөндеу, қалпына келтіру жұмыстары жүргізілді. Айнакөл 60 көшесінде жаңа тренажерлер, шағын сәулет нысандары орнатылды.Т.Жүргенов 30 көшесінде  жаңадан балаларға арналған ойын алаңы ашылып, қолданысқа берілді. К.Әзірбаев көшесі бойындағы саябақ абаттандырылды, - деді М.Берікболқызы.

Халық қалаулысы тағы бір атқарылған игі шара ретінде қаладағы «София» тұрғын үй кешені аумағында футбол алаңы орнатылып, пайдалануға берілгенін жеткізді.

Р.Қошқарбаев 46 көшесінде  тұрғын үй ауласына асфальттау жұмыстары жүргізіліп, шағын сәулет нысандары орнатылды. Ж. Нәжімеденов 16, 16А көшелерінде жол жөндеуден өтті. Айнакөл 58 көшесінде ерекше қажеттілігі бар адамдарға арнайы белгілер орнатылды. Одан бөлек, Ж.Нәжімеденов көшесі 10/2; Р. Қошқарбаев көшесі 25; Ж.Нәжімеденов көшесі 16в; Ш.Қалдаяқов көшесі 13; Ж.Нәжімеденов көшесі 20; Ж. Нәжімеденов көшесі 16 көшелерінде шағын сәулет нысандары қойылды, - деп сөзін түйіндеді  спикер.