Астананың Нұра ауданында аулаларды безендіру бойынша байқау басталды
Жаңа жыл қарсаңында елорданың Нұра ауданында аулалар арасында байқау басталды. Ең креативті және жайлы үш аула тұрғындары бағалы сыйлықтармен марапатталады, деп хабарлады Elordainfo.kz.
Байқау 17-27 желтоқсан аралығында өтеді. Жеңімпаздарды әкімдік пен Урбанистика орталығының мамандарынан құралған арнайы комиссия анықтайды.
Бағалау кезінде мыналар ескеріледі:
- идеяның өзіндік ерекшелігі;
- безендірудің эстетикасы мен ұқыптылығы;
- жарықтандырумен безендеу;
- мерекелік жаңа жылдық атмосфераны құру.
«Конкурсқа қатысу үшін кез келген Instagram парақшасында безендірілген ауланың фотосын немесе видеосын жариялау керек. Парақшаның ашық болуы маңызды. @rishat_turdybekov және @nura.audany парақшаларына жазылыңыз. Жазбада міндетті түрде #ЖаңаЖылНұраАуданы хештегі болуы қажет», - делінген аудандық әкімдіктің хабарламасында.
Жеңімпаздар 28 желтоқсанда аудан әкімдігінің ресми парақшасында жарияланады.