Астанада педагогтер арасында ұлттық ойыннан жарыс өтті
Бүгін Астана қаласы Білім басқармасы Әдістемелік орталығының ұйымдастыруымен № 5 «Ақбота» балабақшасында мемлекеттік балабақшалардағы тәрбиешілер арасында «Бестемше» ұлттық ойынынан «Зияткер педагог» атты қалалық жарыс өтті, деп хабарлады Elordainfo.kz Қалалық әкімдіктің Білім басқармасына сілтеме жасап.
Ұлттық жарыстың салтанатты ашылуында |Астана қаласы Білім басқармасы Әдістемелік орталығы басшысының орынбасары Дидар Дулатұлы сөз сөйледі. Ол жас ұрпақты тәрбиелеуге ат салысып, ұлттық ойынды жаңғыртуға қолдау білдіріп қатысып жатқан тәрбиешілерге алғысын білдірді.
Бестемше ойыны елімізде және шет елдерде кеңінен таралып, балабақша және мектеп бағдарламаларына енуі ұлттық ойынның бала тәрбиесінде алатын орны мен маңызына байланысты болып отыр.
Астана қаласының балабақшалары еліміз бойынша бірінші болып бестемше ойынын балабақша бағдарламасына енгізген. Бұдан кейін Республиканың басқа қалалары біртендеп қолға ала бастады.
«Бүгін біздің балабақшамызда «Бестемше» ұлттық ойыны кең көлемде өткізіліп отыр. Өткен жылы ұйымдастырылған қалалық жарысқа он алты педагог қатысты. Осы жылы сексен педагогтен өтініш келіп түсіп, ішінен 60 педагогты іріктеп алдық», - деді ұлттық ойынды өткізіп жатқан № 5 «Ақбота» балабақшасының меңгерушісі Мөлдір Айтқалиқызы.
Бестемше ойынын №5 «Ақбота» балабақшасы өткен жылы жан-жақты зерттеу жүргізді әрі Түркия елімен екі жақты меморандумға отырды. Қазіргі кезде Түркия елінің мектеп оқушылары да бестемше ойынын ойнайды.
Бүгінгі өтіп жатқан қалалық бестемше жарысына әділ қазылар алқасының төрағасы болып «Тоғызқұмалақ Зияткерлік Қауымдастығы» РҚБ-і вице-президенті Мақсат Есенбекұлы зияткер педагогердің санын арттыруда бұл ойынның маңызы зор екенін айтты.
Жарты күнге созылған жарыста 60 педагог ішінен төрт балабақшаның тәрбиешісі жеңімпаз атанып, республикалық сайысқа жолдама алды. Бестемше ойынының ерекшелігі – жеңімпаз ретінде төрт адамның анықталуы. Себебі жұп болып ойнайтын ойынның шешімі жұппен аяқталу қажет екен.
Сайыс жеңімпаздары:
І орын – Бабиева Дана Кайратовна, Астана қаласы әкімдігінің №78 «Асыл» балабақшасының тәрбиешісі;
ІІ орын – Газизова Галия Хазиуллиновна, Астана қаласы әкімдігінің №25 «Таңшолпан» балабақшасының тәрбиешісі;
ІІІ орын – Дүйсенбай Аякөз Дүйсенбайқызы, Астана қаласының №65 «Бал бала» балабақшасының тәрбиешісі; Рақмет Таңшолпан №5 «Ақбота» балабақшасының тәрбиешісі;