Елорда жаңалықтары

Астанада қар күреу жұмыстарына 2 700-ден астам жол жұмысшысы шықты

Қыс мезгілі басталғалы коммуналдық қызметтер елорданың көшелері мен алаңдарынан 831 мың текше метрден астам қар шығарды. Жұмыстар тәулік бойы үздіксіз режимде жүргізілуде, деп хабарлады Elordainfo.kz қала әкімдігінің ресми сайтына сілтеме жасап.

3-інен 4 желтоқсанға қараған түнде қар полигондарына 169 рейс, яғни 1 828 текше метр қар шығарылды.

4 желтоқсандағы күндізгі ауысымда қар тазалау жұмыстарында 2,7 мыңнан астам жол жұмысшысы және мыңға жуық арнайы техника жұмыс істейді.

Қыс мезгілі басталғалы қаладан 65 мыңға жуық рейспен 831 мың текше метрден астам қар шығарылды.

Ережеге сәйкес, ең алдымен, қалада кептеліс болмас үшін өте қарқынды қозғалыс учаскелері тазаланады. Сондай-ақ орташа қарқындылығы бар учаскелер алаңдар, вокзал маңы аумақтары, тротуарлар, әлеуметтік нысандарға кірме жолдар және т.б. орындар қардан тазартылады.

Орталық көшелерде, жолаушылар көлігі маршруттарында, аялдамалар мен тротуарларды тазалау басымдыққа ие.

Астанада бірнеше жабдықталған қар полигоны жұмыс істейді. Олар самосвал техникасының нөмірлік белгілерін оқу жүйесімен жабдықталған, мұнда бейнебақылау камералары орнатылған, жарықтандыру қосылған.

Елорда тұрғындары мен қонақтарынан жолдарда абай болуды, қауіпсіздік ережелерін сақтауды, дауылды ескерту болған жағдайда алыс сапарлардан бас тартуды сұраймыз, - делінген хабарламада.

Айта кетейік, төтенше жағдай туындаған кезде «112» телефонына хабарласқан жөн.