Олжас Бектенов әкімдерге цифрлық инфрақұрылым құруды тапсырды
Бұл туралы Премьер-министр Олжас Бектенов Үкімет отырысында айтты, деп хабарлады Elordainfo.kz.
«Мемлекет басшысы 2029 жылы цифрлық технологиялардың экономикаға қосатын үлесін 1%-ға дейін, ал ІТ-қызметтердегі жергілікті үлесті кемінде 80%-ға жеткізу міндетін қойды. Оған қол жеткізуде IT-хабтар мен венчурлік қорлар басты драйверлерге айналуға тиіс. Соңғы алты жылда Қазақстанда венчурлік қаржыландыру көлемі 6 еседен астам өскен. Әрі қарай өсу үшін біз осы саладағы озық сарапшыларды тартуымыз керек. Бұл орайда білім беру бағдарламаларын дамытып, ірі бизнесті тарту және сауатты цифрлық инфрақұрылым құру жұмыстарына жете көңіл бөлу қажет. Өңірлерде цифрлық инфрақұрылым толық қамтамасыз етілмеген. Әкімдіктер бұл мәселеге жеткілікті көңіл бөлмей келеді. Өңірлік хабтарға қаржылық және инфрақұрылымдық қолдау көрсету өте маңызды», - деп атап өтті Олжас Бектенов.
Цифрлық даму министрлігіне өңірлер әкімдіктерімен бірлесе, Astana Hub-ты дамыту, өңірлік хабтарды қолдау және IT-салада экспортқа бағдарланған бағыттардың дамуы үшін қолайлы жағдай жасау бойынша шаралар қабылдау тапсырылды.