Астанада АЭС құрылысын талқылауға арналған жиын өтті
Л.Н. Гумилев атындағы Еуразия ұлттық университетінде Қазақстандағы атом электр станциясын салу бойынша референдумға арналған дөңгелек үстел өтті. Іс-шараға оқытушылар, студенттер және БАҚ өкілдері қатысты, деп хабарлады Elordainfo.kz.
Дөңгелек үстелдің мақсаты - атом электр станциясы құрылысы мәселелері бойынша пікір алмасу. Қатысушылар бұл маңызды қадамның Қазақстан энергетикасының дамуына әсері мен мүмкіндіктерін талқылады. Азаматтардың денін АЭС-тің Балқаш көлінің жағдайына әсері алаңдатады екен. Еуразия ұлттық университетінің ядролық физика кафедрасының оқытушысы Нұрлан Амангелдінің айтуынша, атом электр станциясының қажеттіліктеріне көлден жыл сайынғы су шығыны табиғи буланудың шамамен 0,33 пайызын ғана құрайды.
«Органикалық отынды жағу кезінде елде 81,6% көмірқышқыл газы, 12,4% метан және 5,6% азот оксидтері шығарылады — бұлар зиянды заттар. Мысалы, егер ЖЭО және АЭС 1 ГВт электр энергиясын өндірсе, ЖЭО 120 мың тонна күкірт диоксидін, 20 мың тонна азот оксидтерін, 1500 тонна ұсақ күл мен 3 миллион тонна көмірқышқыл газын, соның ішінде 300-400 мың тонна күл шығарады. Ал АЭС бұндай зиянды заттарды шығармайды — олардың саны 0 тонна», – деді ол дөңгелек үстел барысында.
«Халықтың саналы түрде таңдау жасауы үшін біздің міндетіміз — жағдайды түсінікті тілмен түсіндіру. Біздің қоғамымыз полигон жылдарынан бері әлі де радиофобияның әсерінде жүр. Радиациядан қорқу азайған жоқ. Адамдар «атом» немесе «ядро» сөздерін естігенде, мәніне үңілместен бірден бас тартады. Дегенмен, уақыт өзгеруде: ядролық реактор жаңарған сайын алдыңғы нұсқаларынан қауіпсіз бола түсті. Қазіргі заманғы станциялар алдыңғы буындармен салыстырғанда айтарлықтай жоғары қауіпсіздік стандарттарына ие – бұл осы саладағы сапалы қадам туралы болжам жасауға мүмкіндік береді», - деді ЕҰУ физика-техникалық факультетінің профессоры Айдар Морзабаев.
Дөңгелек үстел барысында сөз сөйлеген ЕҰУ профессоры Айсұлу Нығыманова 1996 жылғы 23 мамырда Целиноград инженерлік-құрылыс институты мен Целиноград педагогикалық институты негізінде Л.Н. Гумилев атындағы Еуразиялық ұлттық университеті құрылып, отандық жоғары білім және ғылым жүйесінде маңызды орын алғанын атап өтті.
«Отандық және шетелдік ғылыми орталықтар атомдық салада жоғары білікті мамандар даярлауға белсенді түрде атсалысып отыр. Олардың арасында — Ұлттық ядролық орталық, Ядролық физика институты, Республикалық диагностикалық орталық, Ұлттық ғылыми-медициналық орталық, Энергетика министрлігінің атом энергиясы комитеті, Астана филиалы Ядролық физика институты, сондай-ақ П.Лебедев атындағы РҒА Біріккен ядролық зерттеулер институты мен «Дубна» мемлекеттік университеті бар. Студенттер осы ұйымдарда тағылымдамадан өтіп, білімін жетілдіріп, практикалық тәжірибе жинайды», – деді спикер.
Нұрлат Байкенже