Абай облысында полиция 10 млн теңгенің есірткісі бар қойманы анықтады
«Қарасора» және «Учаске» жедел-профилактикалық іс-шарасы барысында полицейлер Семей қаласының маңындағы қараусыз қалған үйден үш қорап есірткі тауып алды, деп хабарлады Elordainfo.kz Polisia.kz-ке сілтеме жасап.
Бұл орынды есірткі сатушылар уақытша қойма ретінде пайдаланған.
«Полицейлер күдіктіні анықтады, ол бұрын сотталған 40 жастағы семейлік азамат болып шықты. Тәркіленген есірткінің жалпы салмағы 66 келіден астам кептірілген марихуана екені анықталды. Қара нарықта мұндай есірткінің құны шамамен 10 миллион теңгені құрайды», - делінген хабарламада.
Есірткі құралдарын аса ірі мөлшерде заңсыз сақтау фактісі бойынша сотқа дейінгі тергеп-тексеру басталды. Күдікті уақытша ұстау изоляторына қамалды.
Полиция қызметкерлері қылмыстық іс бойынша айыпталушылардың қылмыстық әрекеттерінің барлық эпизодтарын анықтау бойынша жұмысты жалғастыруда. Тергеу жүргізіліп жатыр.