ТЖМ «Қауіпсіздік отбасыңнан басталады!» челленджін бастады
Акция «Қазақстан балалары» республикалық бағдарламасы аясында ұйымдастырылды, деп хабарлады Elordainfo.kz.
Халықаралық балаларды қорғау күні қарсаңындағы челлендж балалар мен ата-аналардың қауіпсіз мінез-құлық мәселелері мен патриоттық тәрбиенің маңыздылығы туралы хабардарлығын арттыруға бағытталған.
Қауіпсіздік пен патриотизм мәдениетін арттыру әркімнің ерте жастан бастап белсенді қатысуын білдіреді. Бұл мәселеде отбасы шешуші рөл атқарады.
Өртке қарсы қызмет комитеті қауіпсіздік туралы білімді отбасылық дәстүрлерге енгізуді қолдайды және эстафетаны азаматтық қорғаныс комитеті мен әскери бөлімдерге жолдады.
Естеріңізге сала кетейік, ТЖМ балаларды қорғау күнін ауқымды мерекелеудің республикалық онкүндігіне қатысады. ТЖМ іс-шаралары 29 мамырда «Балалар қауіпсіздігі – басты назарда!» ұранымен өткізіледі.