Мемлекет басшысы әйелдер қауымын 8 наурыз мерекесімен құттықтады
Мемлекет басшысы Қасым-Жомарт Тоқаев Қазақстан әйелдерін 8 наурыз – Халықаралық әйелдер күнімен құттықтады, деп хабарлады Elorda.info Ақорданың ресми сайтына сілтеме жасап.
-->Мемлекет басшысы Қасым-Жомарт Тоқаев Қазақстан әйелдерін 8 наурыз – Халықаралық әйелдер күнімен құттықтады, деп хабарлады Elorda.info Ақорданың ресми сайтына сілтеме жасап.
Қымбатты ханымдар!
Баршаңызды Халықаралық әйелдер күнімен шын жүректен құттықтаймын!
Сіздер әлемге жылулық пен жарасым сыйлап, жақын жандарыңызды махаббатқа бөлейсіздер. Аяулы аналарымыз өскелең ұрпақтың бойына адамгершілік құндылықтарды сіңіріп, оларды еңбекқор, білімпаз болуға тәрбиелейді.
Бүгінде әйелдер қауымының отбасындағы, қоғам өміріндегі және мемлекетті жан-жақты дамыту ісіндегі рөлі орасан зор.
Қыз-келіншектер өндірісте, шығармашылық жолында, саясат, бизнес және басқа да көптеген салада биік белестерді бағындырып келеді.
Мемлекет гендерлік теңдікті сақтауға, әйелдер құқығын қорғауға және отбасы құндылықтарын нығайтуға әрдайым баса мән береді.
Аналарымыз бен аруларымыздың алаңсыз өмірі – ұлтымыздың жарқын болашағының кепілі.
Сіздерге зор денсаулық, бақ-береке тілеймін!
Әрдайым көктем күніндей жадырап жүріңіздер! – деді Президент.