Әлеумет

Қаңтар оқиғасының жай-жапсарын талдап-талқылауды жалғастыра береміз – Мәжіліс төрағасы

31-03-2023 Елорда ақпарат

Ерлан Қошанов Мәжілістің жалпы отырысында депутаттар қаңтар оқиғасының жай-жапсарын талдап-талқылауды жалғастыра беретінін айтты, деп хабарлады Elorda.info.

Мәжіліс төрағасы атап өткендей, биыл Мәжіліс қарауында 154 заң жобасы болды. Соның 93-і талқыланып, Сенатқа жолданған. Бұл құжаттардың 75-іне Мемлекет басшысы қол қойды.

Сондай-ақ ол 2023 жылы Парламент Мәжілісі өз жұмысын жаңа конституциялық жағдайда бастайтынын еске салды. Мәжіліс заңдарды дербес қабылдайтын болады.

-->

Бүгін Парламент Мәжілісінің осы жылдағы қорытынды жалпы отырысын өткізіп отырмыз. Бір жыл ішіндегі оқиғалар мемлекеттің, қоғамның болмысы мен табиғатын түбегейлі өзгертті десек, артық айтқандық емес. Жыл басындағы «Қаңтар оқиғасы» бәріміз үшін ауыр сынақ әрі сабақ болды. Сол сынақтарға жауап ретінде, Мемлекет басшысы Қасым-Жомарт Кемелұлы Тоқаев елде кең көлемді әрі батыл саяси реформаларды қолға алды. Бұл оң өзгерістерді Жалпыхалықтық референдумда азаматтарымыздың қызу қолдағанына бәріміз куәміз. Өздеріңіз де білесіздер, қазіргі уақытта ел азаматтарының ертеңгі күнге деген үміті оянып, сенімі артып келеді. Ең бастысы, біз осы сенімді жоғалтып алмауымыз керек, - деді ол.

Алғаш рет Мәжілісте «Қаңтар оқиғасын» тергеу барысының алдын ала қорытындысын ашық түрде тыңдадық. Тәуелсіз Қазақстан тарихының ең бір қайғылы парағына айналған қанды оқиғаның жай-жапсарын талдап-талқылау жалғаса бермек. Бұл күрделі мәселе депутаттардың ұдайы назарында болады. Жаңа жыл басындағы алғашқы жиындардың бірінде оған тағы да арнайы ораламыз. Сонымен қатар біз осы жылдың ішінде барлық өңірлерде, ауыл-аймақта болдық. Жұртшылықтың мұң-мұқтажын бөлісіп, ашық, қоян-қолтық жұмыс істедік. Осы үрдіс алдағы уақытта да белсенді түрде жалғасуы керек деп санаймын, - деді Е. Қошанов.