Шыңжаңдық этникалық қазақ жартылай марафонда рекорд жаңартты

Қытайдың Чунцин қаласында өткен жартылай марафонда Шыңжаңның тумасы Досбол Қабылжан ерлер арасындағы жарыста 1 сағат 4 минут 21 секунд тамаша нәтиже көрсетіп, жарыс рекордын жаңартты, деп хабарлады Elordainfo.kz қытайлық Harajorga басылымына сілтеме жасап.

Қытайлық БАҚ-тың хабарлауынша, 22 жастағы Досбол Іле қазақ автономиялық облысының Нылқы ауданына қарасты шағын ауылда дүниеге келген.

Бала кезінен жүгіруге әуес болған оны 14 жасында дене шынықтыру пәні мұғалімі байқап, 3000 және 5000 метр қашықтықтар бойынша маманданған орта және ұзақ қашықтыққа жүгіру бойынша кәсіби дайындықты бастаған.

2023 жылдың қазан айында Досбол Қабылжан Іле өзені марафонында ерлер арасындағы толық марафонда 2 сағат 21 минут 22 секунд уақытпен жеңіске жетіп, керемет дебют жасаған.

Қытайлық БАҚ-тың дерегінше, биылғы сәуірде ол Тұрпан Цзяохэ марафонында 2 сағат, 20 минут 12 секунд уақытпен толық марафондық ерлер арасындағы біріншілікте жеңімпаз атанды. Ал мамырда ол Кука марафонында ерлер арасындағы толық марафон чемпионатында жеңіске жетті. Екі аптадан кейін ол Іле өзені марафоны жартылай марафонында тағы да чемпион атанған.

Сонымен қатар Досбол Қабылжан 2025 жыл 17 тамызда Джимсар Тяньшань марафонында 2 сағат, 19 минут және 36 секунд уақытпен жеңіске жетіп, толық марафон үшін жаңа жеке рекорд орнатты.